राम मंदिर उद्घाटनावर या पक्षांचा बहिष्कार

मुंबई : अयोध्येत मंदिर उद्घाटनाचे निमंत्रण मिळाले असले तरी आमचा पक्ष २२ जानेवारीच्या कार्यक्रमाला जाणार नाही असे इंडिया आघाडीतील प्रमुख पक्ष असलेल्या मार्क्सवादी कम्युनिस्ट पक्षाने मंगळवारी जाहीर केले. माकप पाठोपाठ डाव्या आघाडीतील भाकपसारखे पक्षही अयोध्या कार्यक्रमावर बहिष्कार टाकण्याची स्पष्ट चिन्हे आहेत.

माकप सरचिटणीस सीताराम येचुरी यांनी राममंदिराच्या उद्घाटनाला उपस्थित राहण्याचे निमंत्रण नाकारताना, निमंत्रण मिळूनही ते कार्यक्रमाला उपस्थित राहणार नाहीत असे म्हटले. भाजप आणि राष्ट्रीय स्वयंसेवक संघाने एका धार्मिक कार्यक्रमाचे सरकारी कार्यक्रमात रूपांतर केले आहे. त्यात पंतप्रधान, उत्तर प्रदेशचे मुख्यमंत्री आणि इतर सरकारी अधिकारी थेट सहभागी होतात हे अतिशय दुर्दैवी आहे. भारतात राज्यकारभाराचे मूलभूत तत्त्व आहे. राज्यघटनेनुसार भारतात राज्यकारभाराला कोणताही धार्मिक संबंध नसावा. पण सत्ताधारी पक्ष त्याचे उल्लंघन करत आहे असेही येचुरी यांनी म्हटले आहे. माकप नेत्या वृंदा करात यांनीही धर्म व राजकारणाची गल्लत केल्याचा ठपका सत्तारूढ भाजपवर ठेवला आहे.

काँग्रेसलाही या सोहळ्याचे निमंत्रण देण्यात आले असले तरी पक्षनेत्या सोनिया गांधी त्यासाठी जातीलच हे निश्चित नाही. सोनिया गांधी यांना निमंत्रण मिळाले पण त्या स्वतः जाणार की पक्षाचे एखादे शिष्टमंडळ मंदिर उद्घाटनात सहभागी होणार हे अजून ठरलेले नाही, असे ज्येष्ठ पक्षनेते दिग्विजयसिंह यांनी अलीकडेच संसद परिसरात पत्रकारांना सांगितले होते. इंडिया आघाडीतील अन्य प्रादेशिक पक्षनेत्यांनी आपल्या भूमिका जाहीर केलेल्या नसल्या तरी काँग्रेसचा निर्णय अंतिम झाल्यावर ते अयोध्येला जायचे की नाही याचा निर्णय घेतील असे मानले जाते. दुसरीकडे भाजपने २२ जानेवारीपासूनचे पुढचे सुमारे तीन महिने राममंदिराचा विषय तापवत ठेवण्याचे नियोजन केले आहे. या काळात देशातील ५४३ लोकसभा व सर्व विधानसभा मतदारसंघांतील कमी कमी अडीच कोटी लोकांना अयोध्या वारी घडविण्याची तयारी भाजपने सुरू केली आहे. त्याची जबाबदारी भाजपचे सर्व खासदार आणि आमदारांवर सोपवण्यात आली आहे. प्रत्येक लोकसभा मतदारसंघातून किमान ५-५ हजार लोकांना वेगवेगळ्या तारखांना येथे आणले जाईल. अशा लोकांची यादी फक्त विद्यमान खासदार आणि आमदारांनीच १ डिसेंबर ते १५ जानेवारीपर्यंत तयार करावी व दिल्लीतही पाठवावी असा निर्णय भाजपच्या सुकाणू समितीने घेतला आहे.