Sun Nov 24 11:39:18 IST 2024
फिफा वर्ल्ड कपमध्ये जपानकडून जर्मनीचा पराभव
विशेष प्रतिनिधी
2022-11-23 22:55:52.0
कतार : 4 वेळा फिफा वर्ल्ड कप जिंकलेल्या जर्मनीला जपाननं चांगलाच तडाखा दिला. ग्रुप E मधल्या या सामन्यात जपाननं जर्मनीला 2-1 अशा फरकानं हरवून सनसनाटी विजयाची नोंद केली.
सौदी अरेबिया आशियातली पहिलीच टीम ठरली होती जिनं अर्जेन्टिनासारख्या बलाढ्य संघाला धूळ चारली. त्यानंतर आणखी एका आशियाई संघानं फिफा वर्ल्ड कपमध्ये चक्क माजी विश्वविजेत्या जर्मनीला पराभूत केलं.
काल अर्जेन्टिनाचा ज्या पद्धतीनं पराभव झाला तसाच पराभव आज जर्मनीला स्वीकारावा लागला. 33 व्या मिनिटाला पेनल्टी किकवर आज जर्मनीला पहिला गोल करुन आघाडी घेण्याची संधी मिळाली. पहिल्या हाफपर्यंत 1-0 अशी जर्मनीकडे आघाडी होती. 74 व्या मिनिटापर्यंत जर्मनीनं ही आघाडी टिकवली होती. पण 75 व्या मिनिटाला जपानच्या रित्सु दोआननं जपानला बरोबरी साधून दिली. पण त्यानंतर पुढच्या आठच मिनिटात जर्मनीला दुसरा धक्का बसला तो तकुमा असोनोच्या गोलमुळे. असोनोनं गोल करताच जर्मन प्रेक्षकांना धक्काच बसला. त्यात पुढच्या राहिलेल्या काही मिनिटांमध्ये जर्मनीनं आक्रमक खेळ करुनही जपानचा बचाव भेदता आला नाही. त्यामुळे सलामीच्याच लढतीत पराभव स्वीकारण्याची वेळ जर्मनीवर आली.
