बांगलादेशातील २७ जिल्ह्यांत हिंदूंवर हल्ले

मुंबई : बांगलादेशात सत्तांतर झाल्यानंतर मोठ्या प्रमाणात हिंसाचार सुरु आहे. देशातील २७ जिल्ह्यांमध्ये हिंदूंवर हल्ले झाले आहेत. मंदिरांना मोठ्या प्रमाणात लक्ष्य करण्यात आलेलं आहे. पोलीस ठाण्यांमध्येही लूटमारीच्या घटना घडल्या आहेत. ढाक्यातील मीरपूर मॉडल पोलीस ठाण्याला आंदोलकांनी आग लावली. त्यात ते जळून खाक झालं.

शेजारच्या बांगलादेशातील परिस्थिती चिघळत चालली असून आंदोलनाच्या वणव्यात अख्खा देश होरपळू लागला आहे. विद्यार्थी संघटनांनी सुरु केलेल्या आंदोलनाला हिंसक वळण लागलं आहे. पंतप्रधान पदाचा राजीनामा देऊन भारतात आश्रयाला असलेल्या शेख हसीना यांच्या अवामी पक्षाच्या नेते आणि पदाधिकाऱ्यांना आंदोलनाची सर्वाधिक झळ बसली आहे. अवामी लीगच्या २० नेत्यांचे मृतदेह हाती लागले आहेत.

शेख हसीना भारतात वास्तव्यास आहेत. त्या सुरक्षित असल्या तरीही त्यांच्या पक्षाचे नेते बांगलादेशात सुरक्षित नाहीत. आंदोलकांच्या रोषाचा सामना त्यांना करावा लागत आहे. लीगच्या २० नेत्यांचे मृतदेह सापडले आहेत. त्यांच्या कुटुंबियांचे मृतदेहदेखील आढळून आले आहेत. पक्षाच्या अनेक नेते, पदाधिकाऱ्यांच्या घरांवर, दुकानांवर हल्ले झाले आहेत. आंदोलकरांनी लूटमार केली आहे. बांगलादेशमधील सतखिरामधे उसळलेल्या हिंसाचारात १० जणांचा मृत्यू झाला आहे. कुमिलामध्ये ११ जणा मारले गेले आहेत. बांगलादेशचे माजी काऊन्सिलर मोहम्मद शाह आलम यांच्या तीन मजली घराला आंदोलकांनी आग लावली आहे. त्यात सहा जणांचा मृत्यू झाला. बांगलादेशातील प्रसिद्ध गायक राहुल आनंद यांचं ढाक्यातील धानमंडीत असलेलं १४० वर्षे जुनं घरं आंदोलकांनी पेटवून दिलं. आनंद यांचं घर सांस्कृतिक केंद्र होतं. पण आंदोलकांनी तेदेखील पेटवलं. त्याआधी त्यांच्या घरात लूटमार झाली. देशात सत्तांतर झाल्यानंतर शेख हसीना यांचे मंत्री अडचणीत आले आहेत. हसीना देश सोडून गेल्या आहेत. त्यांचे मंत्रीदेखील त्याच मार्गानं जाण्याच्या तयारीत आहेत. माजी परराष्ट्र मंत्री हसन महसूद भारतात येण्याच्या तयारीत होते. ते विमानात चढणार होते. पण त्याआधीच त्यांना ढाका विमानतळावर अटक करण्यात आली. अवामी लीगचे अनेक बडे नेते आणि माजी कॅबिनेट मंत्री देश सोडून गेले आहेत. अवामी लीगचे महासचिव आणि रस्ते वाहतूक मंत्री अब्दुल क्वादर रविवारी रात्रीच देश सोडून फरार झाले. हसीना सरकारमध्ये मंत्री राहिलेले अनिसुल हक देश सोडून अज्ञातस्थळी गेले आहेत. हसीना देश सोडून जाण्याआधीच त्यांनी अज्ञातस्थळ गाठलं.