कोलकाता हत्येप्रकरणी आई वडील आणि मित्रांचा संशय, नवीन माहिती पुढे

कोलकाता : ३१ वर्षीय डॉक्टरला असं काही माहित होतं की जे तिला माहिती नसायला हवं होतं? याचं रहस्य तिला माहिती असल्याने तिला जीव गमवावा लागला का? असे एक न् अनेक प्रश्न तिचे आई वडिल आणि सहकारी डॉक्टरांनी उपस्थित केले आहेत.

संजय रॉय या आरोपी पोलीस स्वयंसेवकामुळे संपूर्ण पोलीस खात्यावर प्रश्नचिन्ह उपस्थित केले जात आहेत. पालकांपासून ते रुग्णालयातील सहकारी डॉक्टरांनी गंभीर आरोप केला आहे की, संजय रॉय हा फक्त मोहरा असून त्याला बळीचा बकरा बनवले गेले आहे. या घटनेत आणखी सूत्रधार असल्याचा आरोप करत ते अद्याप पकडले गेले नाहीत.

पोलिसांनी आतापर्यंत मृत डॉक्टरची डायरी आणि तिच्या पालकांकडून मिळालेल्या माहितीनुसार तपास सुरु केला आहे. तिच्या डायरीत लिहिले असल्याप्रमाणे गेल्या काही आठवड्यांपासून ती खूप दबावाखाली होती ज्यामुळे ती तणावात होती. याआधीही तिने पीजीटीच्या प्रशिक्षण काळात शासकीय मेडिकल कॉलेज आणि रुग्णालयात एक वर्षाहून अधिक काळ काम केले होते. तिने याबद्दल डायरित लिहिले होते की, अशा वैद्यकीय संस्थांमध्ये प्रशिक्षणार्थी डॉक्टरांनी सतत ३६ तास काम करणे सामान्य आहे. डॉक्टरच्या एका सहकाऱ्याने सांगितले की, आम्हाला ही घटना साधी वाटत नाही. तिच्यावर निशाण्यावर ठेवून शिकार बनवले गेले होते. संजय रॉयला नेमकं कसं कळालं होतं की, ती त्यावेळी सेमिनार हॉलमध्ये होती. यामुळे ती मोठ्या कटाची शिकार बनली आहे ही शक्यता नाकारता येत नाही. संशयाच्या फेऱ्ंयात अडकलेले माजी प्राचार्य संदीप घोष यांच्यावरही सहकाऱ्यांनी मोठा आरोप केला आहे. त्यांनी म्हटले की, संदिप घोष यांच्या जाळ्यात डॉक्टर अडकली होती. जे की संदिप यांनी एक वैद्यकीय महाविद्यालयासाठी त्यांनी एक एसओपी जारी केली होती, ज्याप्रमाणे सर्वांनाच अधिकचे तास काम करावे लागणार. संदीप घोष यांच्या नेतृत्वात आरजी कर प्रशासनाकडून ही एसओपी कार्यरत ठेवण्यात आली होती. आणि यामध्ये खंड पडल्यास प्राध्यापक सदस्यांची बदली झालीच समजा. तर एमबीबीएस विद्यार्थ्यांना मुद्दामहून नापास देखील केले जात होते. काही अन्य सहकाऱ्यांनी या हत्या प्रकरणामागे ड्रग्ज रॅकेट असल्याचाही आरोप केला आहे. कारण त्यांच्या विभागात संभाव्य ड्रग्ज साइफनिंग रॅकेटची बऱ्याच दिवसांपासून चर्चा सुरु होती, ज्याचा ती पर्दाफाश करण्याच्या प्रयत्नात होती. ती इमानदार डॉक्टर होती त्यामुळे आमचा यावरील संशय वाढला आहे. ९ ऑगस्टला आपल्या मुलीच्या मृत्यूची माहिती समजताच कुटुंब शोकाकुल झाले आहे. तर आपल्या मुलीच्या मृत्यूला कॉलेज प्रशासनाला जबाबदार धरत आहे. तिच्या पालकांनी पोलिसांना सांगितले की, डॉक्टर मुलीने तिच्यावर कामाचा जास्त दबाव असल्याचे सांगितले होते. काही सहकारी तिच्यावर अधिकचे काम लादत असल्याचे तिच्या डायरीत लिहले होते. पालकांनी पोलिसांना आणखी एक धक्कादायक गोष्ट सांगितली की, त्यांच्या मुलीने विभागात काहीतरी असे पाहिले आणि ऐकले की, जे तिने करायला नको होते. सहकारी आणि अधिकाऱ्यांनीही हॉस्पिटलमधील अनेक अनियमिततेकडे तपास यंत्रणा आणि पोलिसांचे लक्ष वेधले आहे आणि असेही सांगितले की जो कोणी याविरोधात उभे राहण्याचे धाडस करेल त्याला 'काही प्रकारची शिक्षा' दिली जाते. सध्या हे प्रकरण सीबीआयकडे सोपवण्यात आले असून संशयितांची कसून चौकशी सुरु आहे.